სასწრაფო სამედიცინო დახმარების ავტომობილს ჩართული აქვს ლურჯი მოელვარე სპეციალური ციმციმა და ხმოვანი სიგნალები. რომელი ავტომობილების მძღოლებმა შეიძლება გააგრძელონ მოძრაობა ისრის მიმართულებით მარეგულირებლის ამ სიგნალზე?

ძალიან მარტივია, დაიმახსოვრე: ვისაც მარეგულირებელი მარცხენა მხრით უდგას, იმას გზა ხსნილი აქვს ყველა მიმართულებით. ამ შემთხვევაში, ესენი არიან სატვირთო და წითელი მანქანა. ამიტომ, ისინი თავისუფლად აგრძელებენ მოძრაობას. ხოლო სასწრაფო და ლურჯი მანქანა მარეგულირებლის მკერდის წინ დგანან. ამ პოზაში მათ მხოლოდ მარჯვნივ შეუძლიათ წასვლა, ამიტომ ელოდებიან. სასწრაფოს ჩართული სიგნალიც კი ვერაფერს შველის, რადგან მარეგულირებელი როცა გზაჯვარედინზე დგას, მისი სიგნალი ყველაზე მთავარია.

კანონი: „საგზაო მოძრაობის შესახებ“ საქართველოს კანონის 30-ე მუხლის მე-5 პუნქტის „გ“ ქვეპუნქტის თანახმად, მარეგულირებლის სიგნალებს აქვთ შემდეგი მნიშვნელობა: გ) წინ გაშვერილი მარჯვენა ხელი − ეს ჟესტი ნიშნავს „სდექ“ სიგნალს მარეგულირებლის მარჯვენა გვერდისა და ზურგის მხრიდან მოძრავი ყველა მძღოლისათვის; ამასთანავე, მარეგულირებლის მარცხენა გვერდის მხრიდან ტრამვაის უფლება აქვს, იმოძრაოს მარცხნივ, ხოლო ურელსო სატრანსპორტო საშუალებას უფლება აქვს, იმოძრაოს ყველა მიმართულებით. მარეგულირებლის მკერდის მხრიდან ყველა სატრანსპორტო საშუალებას უფლება აქვს, იმოძრაოს მხოლოდ მარჯვნივ. ქვეითს უფლება აქვს, გადავიდეს სავალ ნაწილზე მარეგუ-ლირებლის ზურგის უკან.