ჭრილობები, დამწვრობა, შოკი, ტრანსპორტირების პოზა

დაიმახსოვრე: მე-2 ხარისხის დამწვრობისას ბუშტებს და ტანსაცმელს არ ვეხებით. ვადებთ სტერილურ საფენს, ყინულს და ვასმევთ წყალს ტკივილგამაყუჩებელთან ერთად.

კანონი: თუ საგზაო-სატრანსპორტო შემთხვევის შედეგად დაშავებულს აღენიშნება კანის მე-2 ხარისხის დამწვრობა (კანის ქსოვილის დარღვევა და მოწითალო შეფერილობა, დამწვრობის ადგილზე სითხით შევსებული ბუშტების წარმოქმნა, ძლიერი ტკივილი) პირველადი სამედიცინო დახმარების აღმოჩენის მიზნით მას ბუშტები არ უნდა გავუხსნათ, ტანსაცმლის ნარჩენები დამწვარი ზედაპირიდან არ მოვაცილოთ, ჭრილობაზე დავადოთ სტერილური საფენი, ბინტით არ შევუხვიოთ, მივადოთ ყინული ან ცივი საფენი, მივცეთ ტკივილგამაყუჩებელი საშუალება (თუ დაშავებულს მის მიმართ ალერგია არ გააჩნია) და დაშავებულს დავალევინოთ წყალი.

დაიმახსოვრე: მუცლის ჭრილობისას დაშავებული გადაგყავს ზურგზე, მოხრილი მუხლებით. ეგაა სწორი პასუხი.

კანონი: მუცლის არეში მიღებული ჭრილობის დროს დაშავებულის ტრანსპორტირება უნდა მოხდეს ზურგზე დაწოლილი მდგომარეობაში მუხლებში მოხრილი ფეხებით.

დაიმახსოვრე: ტვინის შერყევისას დაშავებულს გვერდზე აწვენ და ტრანსპორტირებაც ასე ხდება. ეგაა სწორი პასუხი.

კანონი: თავის ტვინის შერყევის შემთხვევაში დაშავებული უნდა დავაწვინოთ გვერდზე და გადავიყვანოთ ასეთ მდგომარეობაში უახლოეს სამედიცინო დაწესებულებაში.

დაიმახსოვრე: გულმკერდის ჭრილობაზე ორი ვარიანტია. ან ჯანმრთელ გვერდზე აწვენ, ან ნახევრად სვამ.

კანონი: დაშავებულის გულმკერდის გამჭოლი ჭრილობით ტრანსპორტირება შეიძლება ჯანმრთელ გვერდზე დაწოლილ ან ნახევრადმჯდომარე მდგომარეობაში.

დაიმახსოვრე: ტანსაცმელს ჯერ ჯანმრთელ ხელზე ხდი, მერე დაშავებულზე. პირიქითაა ჩაცმისას.

კანონი: ერთი ხელის დაზიანების შემთხვევაში დაშავებულს პიჯაკი ან პერანგი ჯერ უნდა გავხადოთ ჯანსაღ, ხოლო შემდეგ დაშავებულ ხელზე.

დაიმახსოვრე: ტრავმული შოკის დროს ჯერ სისხლდენა შეუჩერე და გაათბე. თბილი სასმელი მხოლოდ მაშინ მიეცი, თუ მუცლის დაზიანებას არ ვეჭვობთ.

კანონი: ტრამვული შოკის დროს დაშავებულს უნდა გაეწიოს შემდეგი პირველადი სამედიცინო დახმარება - აუცილებლობის შემთხვევაში შევაჩეროთ სისხლდენა, დავაფაროთ სათბურები, თუ არ ვეჭვობთ მუცლის ღრუს შიდა ორგანოების დაზიანებას - დავალევინოთ თბილი სასმელი.

დაიმახსოვრე: თუ კანი და კუნთია დაზიანებული, ჭრილობას გარშემო იოდი უნდა წაუსვა. მერე დაადე ბაქტერიციდული საფენი, თუ არ გაქვს - სუფთაც წავა.

კანონი: საგზაო-სატრანსპორტო შემთხვევის შედეგად დაშავებულის კანის საფარველისა და კუნთოვანი ქსოვილის დაზიანების შემთხვევაში ჭრილობა უნდა დამუშავდეს გარშემო იოდის ხსნარით და დაედოს ბაქტერიციდული საფენი (მისი არ ქონის შემთხვევაში დაედოს სუფთა საფენი).

დაიმახსოვრე: წვივ-ტერფის სახსრის დაზიანებაზე პასუხია „რვიანისებური“. სხვა ვარიანტებზე არც იფიქრო.

კანონი: საგზაო-სატრანსპორტო შემთხვევის შედეგად დაშავებულის წვივ-ტერფის სახსრის დაზიანებისას გამოიყენება რვიანისებური სახვევი.

დაიმახსოვრე: გოგირდის მჟავა თუა, მთავარია ბევრი წყალი. ეგრევე უნდა ჩამობანო.

კანონი: საგზაო-სატრანსპორტო შემთხვევის შედეგად დაშავებულს გოგირდის მჟავით დაზიანებული კანის უბნები უნდა გადაერეცხოს წყლის უხვი რაოდენობით.

დაიმახსოვრე: იოდს ვუსვამთ ჭრილობის ნაპირებზე და გარშემო კანზე. პირდაპირ ჭრილობაში არ ასხამენ

კანონი: საგზაო-სატრანსპორტო შემთხვევის შედეგად დაშავებულის ჭრილობის შემთხვევაში იოდის ხსნარი, როგორც სადეზინფექციო საშუალება გამოიყენება ჭრილობის ნაპირებისა და მისი მიმდებარე კანის დასამუშავებლად.

დაიმახსოვრე: თვალის ჭრილობისას დაშავებულს აწვენ ზურგზე და თავს უწევ წინ. შემდეგ დაზიანებულ თვალზე ადებ სუფთა საფენს.

კანონი: საგზაო-სატრანსპორტო შემთხვევის შედეგად დაშავებულის თვალის ჭრილობის დროს დაშავებული უნდა დავაწვინოთ ზურგზე და თავი წამოვუწიოთ წინ. დაზიანებულ თვალზე უნდა დავადოთ სუფთა საფენი.

დაიმახსოვრე, თავის ტრავმის დროს ოთხი რამეა მთავარი: კისრის ფიქსაცია, ჭრილობაზე ნახვევი, გვერდზე დაწვენა და თავზე სიცივე. ეს არის ყველაზე გრძელი პასუხი და ოთხივე კომპონენტი უნდა ეწეროს.

კანონი: თუ საგზაო-სატრანსპორტო შემთხვევის შედეგად დაშავებულს აღენიშნება ტრაბმები თავის თმიან ადგილებზე, პირველადი სამედიცინო დახმარების აღმოჩენის მიზნით, მას უნდა კისერზე დაედოს იმპროვიზირებული ნახვევი, ჭრილობაზე სტერილური ბინტით დაედოს დამწოლი ნახვევი, დაშავებული დავაწვინოთ გვერდზე მუხლებში მოხრილი ფეხებით, თავზე მივადოთ ყინული ან ცივი საფენი.