მოტეხილობები და ხერხემლის დაზიანება

დაიმახსოვრე: თუ კისერი აქვს დაზიანებული, მჯდომარეს ზურგიდან შეუცურე ხელები, დაუფიქსირე ყბა და კისერი და უკან გაათრიე.

კანონი: დამხმარეს გარეშე დაშავებულის გადათრევით გადაადგილება კისრის ან ხერხემლის დაზიანების ეჭვის შემთხვევაში, თუ მის სიცოცხლეს საფრთხე ემუქრება უნდა მოხდეს შემდეგნაირად - მოათავსეთ დაშავებული მჯდომარე პოზიციაში. დადექით დაშავებულის ზურგს უკან, მკლავები მხრებქვეშ შეუცურეთ, დავაფიქსიროთ ქვედა ყბა და კისერი და ისე გადათრევით გადავაადგილოთ უკან.

დაიმახსოვრე: თუ არტაშანი არ გაქვს, მოტეხილ ფეხს ჯანმრთელ ფეხს უმაგრებ. შუაში რბილი ქსოვილი არ დაგავიწყდეს.

კანონი: საგზაო-სატრანსპორტო შემთხვევის შედეგად დაშავებულის ფეხის ძვლის მოტეხილობის შემთხვევაში, თუ არა გვაქვს არტაშანის დასამზადებელი მასალა დაშავებულს დაზიანებული და ჯანმრთელი ფეხი უნდა დავამაგროთ ერთმანეთს ბინტის სახვევის გამოყენებით. ამასთან აუცილებელია ფეხებს შორის ჩავუდოთ რბილი ქსოვილი.

დაიმახსოვრე: მენჯის და ბარძაყის მოტეხილობისას დაშავებული დააწვინე ზურგზე. მუხლებქვეშ ამოუდე რამე და მიეცი ტკივილგამაყუჩებელი.

კანონი: მენჯისა და ბარძაყის ძვლის მოტეხილობის შემთხვევაში „სასწრაფო სამედიცინო დახმარების“ მოსვლამდე დაშავებული უნდა დავაწვინოთ ზურგზე მუხლებ ქვეშ ამოვუდოთ მჭიდროდ დახვეული საფენი ან ტანსაცმელი, მივცეთ ტკივილგამაყუჩებელი საშუალება.

დაიმახსოვრე: კისრის ტრავმის სიმპტომია ტკივილი კისერსა და ზურგში. ეს ტკივილი მატულობს ხელით შეხებისას.

კანონი: საგზაო-სატრანსპორტო შემთხვევის შედეგად დაშავებულის ზურგის ტვინის დაუზიანებლად კისრის ხერხემლის მალების ტრავმების სიმპტომებია - ტკივილი კისრისა და ზურგის არეში. ტკივილი მატულობს ხელით შეხებისას.

დაიმახსოვრე: თუ კისერი ან ხერხემალია დაზიანებული, არაფერს არ ვეხებით და არ ვამოძრავებთ. ეს ეხება თავს, კისერს, ჭრილობას, ძვლის ნამსხვრევებს და უცხო სხეულებს.

კანონი: საგზაო-სატრანსპორტო შემთხვევის შედეგად დაშავებულის კისრის ან ხერხემლის დაზიანებისას ან მასზე ეჭვის მიტანისას არ შეიძლება: - დაზარალებულისთვის თავისა და კისრის მოძრაობა; - ჭრილობაზე შეხება; - ძვლის ნამსხვრევების ჩასწორება; - უცხო სხეულების მოცილება.

დაიმახსოვრე: ხერხემლის დაზიანებისას დაშავებული დააწვინე ზურგზე, სწორ და მაგარ ზედაპირზე. შემდეგ კი ბალიში ამოუდე კისრისა და წელის არეში.

კანონი: საგზაო-სატრანსპორტო შემთხვევის შედეგად დაშავებულის ხერხემლის დაზიანების დროს დაშავებული უნდა დავაწვინოთ ზურგზე, სწორ და მაგარ ზედაპირზე და ამოვუდოთ ბალიში კისრისა და წელის არეში.

დაიმახსოვრე: ხერხემლის ტრავმისას მთავარია სწორი და მაგარი ზედაპირი, მაგალითად ფიცარი. დააწვინე ზურგზე და მხოლოდ ასე გადაიყვანე.

კანონი: ყველაზე საშიშია დაზიანებული ხერხემლით დაშავებულის ტრანსპორტირება. ხერხემლის ოდნავ გადაადგილებამ შეიძლება გამოიწვიოს ზურგის ტვინის გაწყვეტა, ამიტომ თუ ეჭვი გვეპარება დაშავებულის ხერხემლის დაზიანებაზე, აკრძალულია მისი დაჯდომა ან ფეხზე დგომა. უპირველეს ყოვლისა აუცილებელია დავაწვინოთ სწორ და მაგარ ზედაპირზე (ხის დაფა, ფიცარი და სხვა მსგავსი). იგივე საგნები გამოიყენება ტრანსპორტირებისათვის.

დაიმახსოვრე: ლავიწის ძვალი თუ მოიტეხა, დაშავებული გადაგყავს მჯდომარე მდგომარეობაში. სხვა არაფერი.

კანონი: საგზაო-სატრანსპორტო შემთხვევის შედეგად დაშავებულის ტრანსპორტირება ლავიწის ძვლის მოტეხილობის დროს უნდა მოხდეს მჯდომარე მდგომარეობაში.

დაიმახსოვრე: წვივის მოტეხილობისას არტაშანი ედება ორივე მხრიდან, ტერფიდან შუა ბარძაყამდე. უბრალოდ დაიზეპირე ეს ფრაზა.

კანონი: საგზაო-სატრანსპორტო შემთხვევის შედეგად დაშავებულის წვივის ძვლების მოტეხილობის დროს დაშავებულ ფეხზე არტაშანი უნდა დაედოს ორივე მხრიდან ტერფიდან შუა ბარძაყამდე.

დაიმახსოვრე: თუ დაშავებულს ნეკნები ან მკერდის ძვალი აქვს მოტეხილი, მისი გადაყვანა შეიძლება მხოლოდ მჯდომარე ან ნახევრად მჯდომარე მდგომარეობაში.

კანონი: საგზაო-სატრანსპორტო შემთხვევის შედეგად დაშავებულის ნეკნებისა და მკერდის ძვლის მოტეხილობის დროს დაშავებულის ტრანსპორტირება უნდა მოხდეს მჯდომარე ან ნახევარმჯდომარე მდგომარეობაში.

დაიმახსოვრე: თუ არტაშანი არ გაქვს, მოტეხილ ხელს კისერზე კიდებ და ტანზე ამაგრებ.

კანონი: არტაშანის დასამზადებელი მასალის არარსებობისას საგზაო-სატრანსპორტო შემთხვევის შედეგად დაშავებულის ხელის ძვლის მოტეხილობის შემთხვევაში, მას უნდა იდაყვში მოხრილი ხელი ჩამოვკიდოთ კისერზე და ბინტის დახვევით მივუმაგროთ ტანზე.